sexta-feira, junho 30, 2006

Blogue de Marcos Teira

Já volta estar actualizado!! Podedes visitá-lo aqui. Nas suas últimas intervençons fai pormenorizadas crónicas dos seus trabalhos, entre eles, a apresentaçom de Narf no Brasil, num encontro cultural entre Niterói e Espanha (o que fai a este clube de fans activar a saudade), e a apresentaçom de Bumba em Portugal. Recomendamos nom perdê-lo.

quarta-feira, junho 28, 2006

O show continua

Como devedes estar comprovando, o clube de fans está médio de férias, é por isso, que tudo vai muito mais l e n t o. Mas nom deixamos de oferecer-vos cousas, embora seja a ritmo de tartaruga.
Aqui tedes outro pedacinho de concerto, o que corresponde com a dança de Mercedes de Rande no tema do pirinho. Que o desfrutedes.

sábado, junho 24, 2006

Concertos para o verao

Aqui vos deixamos a lista de concertos de Marful para este verao. Já sabedes que nós trataremos de estar no maior número possível, e se estamos ali, faremos crónica aqui (assim som as cousas e assim vo-las contamos):

- 28 de Julho ás 23.30 em Outes, no I Festival Acarinhando Raigames.
- 11 de Agosto em Bueu.
- 14 de Agosto em Foz, no Festival Músicas da Marinha com Batuko Tabanka e Safari Orquestra.
- 18 de Agosto em Riba d´Ávia.

Bocados de espectáculo

Pois para as que nom tiveram oportunidade de estar ali, e para as que estando, gostam de rememorar, começamos a oferecer-vos bocadinhos pequenos do que foi o concerto do 16 de Junho em Compostela.
Para ir fazendo boca, este pedacinho de tango dançado deliciosamente:


segunda-feira, junho 19, 2006

Novo encontro

Ainda sem recuperar da ressaca emocional, temos um novo concerto de Marful este sábado 24 de Junho. Será no Auditório de Galiza dentro das actividades de Recuperando a memória histórica.
Se queredes consultar o programa, pinchade na imagem:

sábado, junho 17, 2006

Palavras de mais

Tentamos fazer a crónica do concerto de ontem no Auditório e as palavras sobram, restam, dividem... Nunca foi tam difícil descrever com a linguagem outra linguagem, a da música mas também a das emoçons. Teríamos que oferecer-vos as nossas maos, o nosso corpo, para que pudéssedes ver todos os sentimentos que nos ficárom colados aos poros.

Dizer que foi um concerto emocionante é apenas um débil substituto, dizer que o cenário e os assentos estavam cheios de carinho é uma evidência insultante para quem ali estivo. Por isso pouca cousa vamos dizer.

Diremos que nom sabemos quanto durou mas que se fijo curto, tremendamente curto. Que estivo cheio de momentos especiais com colaboradores que abrigárom a música com as suas vozes, as suas músicas e as suas danças. Que tivemos o enorme privilégio de ver um tango bailado entre dous homens como era tradicional na Argentina, nos inícios do tango. Um momento impressionante com dous bailarinos que se comunicavam deliciosamente, delicadamente, mesmo diria que honestamente. Entre os bailes, um momento de dança contemporânea a acompanhar o pirinho, entre o abraço e o rejeitamento, cheio de força. E um espectacular Henrique Peom que nos pujo a pele de pita. As vozes de Guadi Galego e Xabier Díaz que acompanhárom a Ugia com o calor que dá a qualidade e a amizade, o violino de Quim Farinha que se integrou na música como um membro mais da já grande família marfuliana.

Rodeados polas espectaculares imagens do Salom de Benito, fotografadas por Fernando Fuentes, os habituais membros de Marful, com Xacobe Martínez e Luis Alberto Rodríguez, dêrom um concerto como nos tenhem acostumadas, que já nom é dizer pouco. Gerando uma fantástica energia que se retroalimentava nos assentos e voltava ao cenário se calhar aumentada, se calhar diminuída, mas sempre em comunicaçom directa e visceral com as que ali estávamos. Só pudemos agradecer-lhes uma noite como esta com a palma das maos, num aplauso que nom foi mais longo apenas para nom obrigá-los a sair de novo, compreendendo que era sim, o momento de acabar. Com a música e o amor na gema dos dedos.

Nom queremos cair no excesso nem superar a nossa habitual loucura, por isso, convidamo-vos a que nos enviedes as vossas impressons para acompanhar esta crónica. Nós tentaremos ir oferecendo-vos as fotografias que pudemos conseguir, se calhar algum vídeo, e as notícias da imprensa.

Ligade aqui para ver a crónica da nossa comentarista arrigadeira.
E outra ligaçom mais para ver os comentários de Rosa Aneiros.
Embora nom podamos pôr aqui a referência, também houve comentários ao respeito no programa de Tino Santiago A crónica, a segunda feira às 21:00 horas, e no de Xurxo Souto, a quarta-feria. Adivinhades em que termos?
Beijos!

quinta-feira, junho 15, 2006

Já está aqui



Aqui podedes ver como foi a apresentaçom à imprensa do concerto.

quarta-feira, junho 14, 2006

Para desfrutar, com todos os sentidos.


Já nom fica nada para o nosso encontro marfuliano mais esperado. O certo é que todos os encontros som muito esperados, mas este, com disco já na rua é um bocado especial. Como concerto especial que é, trae surpresas para desfrutar com todos os sentidos.

O baile, essa linguagem directa e sincera, essa linguagem em que nom se pode mentir, vai ter protagonismo importante no concerto do Auditório de Galiza esta sexta-feira.

Ali vam estar Mercé de Rande, coreógrafa galega de dança contemporânea assentada em Zurich.

Henrique Peom, sem dúvida um dos grandes mestres do baile tradicional na Galiza e director desde há 20 anos da Associaçom Xacarandaina da Corunha.

Um par do colectivo de baile Danzom de Santiago, entre eles José Candal.

Para as que estaremos abaixo, sem poder dançar, será um bonito sustituto. Já temos a boca cheia de água prevendo esse momento.

terça-feira, junho 13, 2006

Festa

Este sábado 17 de Junho, com a ressaca do concerto em Sons da Diversidade, podemos marcar outro encontro para seguir aos Marful, esta vez por partes.

No Casino de Lalim e organizado polo Conservatório de Música Tradicional e Folque de Lalim concerto em que se apresentará o Tango Estudo de Pintura do Pedro Pascual. E por se fora pouco, também actuará uma das nossas queridas fans, a fam namber 12.

Um bocado mais tarde, o sábado 1 de Julho, apresenta-se em Vigo, no Imaxina Sons a orquestra galega de jazz, a Imaxina Sons Orquestra, onde toca o clarinete baixo o Pablo Pascual. Embora em todas partes se empenhem em escrever que tocará o saxo :-).

Mais apariçons nos médios.

Na nossa incansável tarefa de seguir aos e à Marful pola imprensa, encontramos estes exemplos novos que vos deixamos aqui.
No Compostelan:


E em Tempos Novos, uma bonita resenha assinada por Olga Nogueira:



E em Galicia Hoxe, no suplemento Lecer, uma nova visom marfuliana esta vez assinada por Emilio Españadero.

sexta-feira, junho 09, 2006

Curiosidade


O Boletim de actualidade lingüística do Sudoeste europeu (Butlletí d'actualitat lingüística del sud-oest europeu:aragonés, astur-lleonés, català, euskara, galaico-português, occitan), Llengues vives, vem de editar um disco com grupos nas línguas desse sudeste europeu do que fala no título com o objectivo de: Les cançons aplegades en aquest CD multicolor contribueixen a fer visible allò que massa sovint des dels Estats s’aigualeix o es nega: la diversitat lingüística d’aquest racó del vell continent que, com totes les diversitats, no pot sinó enriquir-nos..
Adivinhade entom quem está neste CD. Nom era difícil. Ao lado de Non residentz, Ecléctica Ensemble, e outros grupos que cantam en euskara, aragonês, catalám, ou asturianu, estám eles e ela, MARFUL.

Desenredando a aranheira.

Para comprar:
Trastenda
Producciones efímeras
Galileo

Comparede preços porque merece a pena ;-)

Para ver/ler:
Todo folk
Ediçom da Marinha de La Voz de Galicia

Novos encontros com Marful nos média

Esta segunda-feira, 12 de Junho, às 12:00 horas, entrevista marfuliana na Rádio Obradoiro.
A próxima terça-feira 13 de Junho, apresentaçom à imprensa no Concelho de Santiago do concerto Sons da Diversidade. Será às 12:30 horas, na concelharia de Cultura.
A quarta-feira 14 de Junho, carregadinha de encontros:
- Entrevista na rádio galega, no programa Um dia por diante, às 12:00 horas.
- Marful em directo na TVG, no Programom, às 16:00 horas.
Assim vamos fazendo crescer água na boca antes do nosso encontro estrela, no Auditório o 16 de Junho.

domingo, junho 04, 2006

Entrevista en Galicia Hoxe

Continuamos a rastejar entrevistas de Marful pola imprensa galega. Sempre com a colaboraçom dos fans amigos, das fans amigas que ajudam a que nom nos esqueça nada.
Esta vez foi em Galicia Hoxe, no suplemento Lecer, do que vos deixamos ligaçom.
É uma entrevista ampla com referências a este clube de fans que vive no acoramento e o agradecemento contínuo.
Como anedota: o Quim Farinha reconvertido em Antom Farinha :-).

sábado, junho 03, 2006

O prometido é devido

Hoje temos uma grande surpresa para todas vós. Em exclusiva para este clube de fans, podemos apresentar-vos a roupa que vai levar Ugia no concerto do 16 de Junho em Sons da diversidade.
A roupa é espectacular e a Ugia está mesmo bonita com ela, mais ainda, se for possível, do que é habitual. Aqui tedes uma foto por se nom acreditades:



E esta é a proposta que os desenhadores da roupa, de La Canalla, de Vigo, lhe enviárom a Ugia para explicar o desenho. Aproveitamos para agradecer-lhes a sua generosidade em oferecer-nos estas imagens e este texto para incluir na nossa página.

LA CANALLA para Ugia Pedreira

proposta


Para o plantexamento do teu vestiario partimos da idea de recrear a imaxe do traxe tradicional galego levándoo a estructuras e acabados contemporáneos.

Como prenda de referencia tiñamos a basquiña, que xa utilizache como imaxe emblemática. Retomamos este concepto mantendo a idea de movemento e presencia escénica que aporta esta peza, así como o carácter simbólico da mesma.

Deste xeito a nosa proposta céntrase en darlle á basquiña unha estética renovada empezando polos tecidos, denim e rede deportiva, como elemento de ruptura.

Buscamos a versatilidade para a posta en escéa e pensamos nunha prenda reversible coa que podas cambiar de imaxe simplemente dándolle a volta.

Unha das caras, a vaqueira, vai traballada con flocados que nos lembran á ornamentación tradicional e con aplicacións de outros tecidos e pespuntes buscando o movemento dentro do movemento da propia saia. Follas e puntadas mézclanse cos flocados creando unha paisaxe de esencia clásica e presencia contemporánea.

A outra posúe unha estética se cadra máis conceptual, retomando pequenos fragmentos dos textos das túas cancións estampados a mán, buscando unha presencia quizáis non perceptible para os outros do teu discurso non só na voz, tamén na roupa. Como lienzo onde plasmar estes textos un vermello intenso, apaixoado...o interior.

Para as dúas caras pensamos en tecidos contemporáneos polas súas connotacións de contraste coa faceta máis convencional dos bailes de salón, o vaqueiro e a rede de deporte completan ó seu percorrido ata a actualidade. Como acabado común, grandes lazos en contraste de cor que aportan frescura e movemento.

Por último, en canto á camiseta buscamos unha estructura de prenda sobre todo cómoda, pero que igualmente complete e potencie a forza escénica da basquiña. Veunos unha imaxe á cabeza, ti dando voltas, bailando cos brazos abertos mentras a música sóa no escenario; xa está, manga xaponesa e “leverelem” na espalda, dunha manga á outra, rodando tamén, liándose co espazo. No dianteiro, os motivos continúan a paisaxe da saia, esta vez estampados a mán, con aplicacións de outros tecidos como elemento común. Escollimos o punto de seda en negro para a camiseta polo contraste cos tecidos da basquiña, totalmente cotiás, aportando unha nota de elegancia.

La Canalla r/ Joaquin Loriga 17, 36203 Vigo_ 986 11 44 93_ 605 26 58 28 lacanallavigo@yahoo.es_www.lacanallavigo.com

quinta-feira, junho 01, 2006

A apresentaçom à imprensa, na imprensa

Assim o recolhêrom nos médios. Em Galicia hoxe

E em La Voz de Galicia